ថ្ងៃ | ទស្សនាទិដ្ឋភាពចរាចរណ៍ក្នុងរាជធានី​ភ្នំពេញ
 សាលា​ឧទ្ធរណ៍​សម្រេច​ដោះលែង យុវជន​គណបក្ស​សង្គ្រោះ​ជាតិ​ទាំង​៣​នាក់​ឲ្យ​នៅ​ក្រៅ​ឃុំ​បណ្ដោះ​អាសន្ន​ហើយ​ នៅ​ព្រឹក​ថ្ងៃទី​២២ ខែ​សីហា ឆ្នាំ២០១៤​នេះ៕​  ||   

សង្គម​ស៊ីវិល​ជំទាស់​ចំពោះ​ការ​សម្រេច​របស់​សាលា​ឧទ្ធរណ៍​ករណី ប៊ន សំណាង, សុខ សំអឿន

ក្រុម​អង្គការ​សង្គម​ស៊ីវិល​ក្នុង​ស្រុក​កាល​ពី​រសៀល​ថ្ងៃ​ម្សិលមិញ បាន​សម្តែង​ការ​ជំទាស់​យ៉ាង​ខ្លាំង​ក្លា ចំពោះ​ការ​សម្រេច​ដែល​នឹក​ស្មាន​មិន​ដល់​របស់​សាលា​ឧទ្ធរណ៍ ដោយ​តម្កល់​សាលក្រម​របស់​សាលា​ដំបូង​ក្រុង​ភ្នំពេញ​ដែល​មិន​យុត្តិធម៌ ​ផ្តន្ទា​ទោស ប៊ន សំណាង និង សុខ សំអឿន ឲ្យ​ជាប់​ពន្ធនាគារ​ម្នាក់ៗ​២០ឆ្នាំ​ឡើង​វិញ ចំពោះ​ករណីបាញ់សម្លាប់លោក ជា វិជ្ជា កាល​ពី​ឆ្នាំ​២០០៤។

ប៊ន សំណាង និង សុខ សំអឿន (រូប៖Licadho)

លោក មឿន តុលា ប្រធាន​ផ្នែក​កម្មវិធី​សិទ្ធិ​ការងារ នៃ​មជ្ឈមណ្ឌល​អប់រំ​ច្បាប់​សម្រាប់​សហគមន៍​បាន​និយាយ​ថា សេចក្តី​សម្រេច​របស់​សាលា​ឧទ្ធរណ៍​ចំពោះ ប៊ន សំណាង និង សុខ សំអឿន នេះ គឺ​មិន​បាន​អនុវត្ត​ទៅ​តាម​គោល​ការណ៍​យុត្តិធម៌ និង​នីតិរដ្ឋ​នោះ​ទេ។

ក្នុង​សេចក្តី​ថ្លែង​ការណ៍​ចុះ​ថ្ងៃទី២៧ ខែ​ធ្នូ ឆ្នាំ​២០១២ ក្រុម​អង្គការ​សង្គម​ស៊ីវិល​បាន​លើក​ឡើង​ថា សវនាការ​របស់​សាលា​ឧទ្ធរណ៍​ដ៏​លឿន ដែល​បាន​ប្រព្រឹត្ត​ឡើង​កាល​ពី​ថ្ងៃទី៧ ខែ​វិច្ឆិកា ឆ្នាំ២០១២ មិន​បាន​ផ្តល់​នូវ​ភស្តុតាង​ថ្មី ដែល​អាច​នឹង​ត្រូវ​បាន​ប្រើ​ដើម្បី​បង្ហាញ​ពី​ពិរុទ្ធ​ភាព​របស់ ប៊ន សំណាង និង សុខ សំអឿន នោះ​ទេ។ ប៉ុន្តែ​ចៅក្រម​ទាំង​ឡាយ​បាន​សម្រេច​ថា អ្នក​ទាំង​ពីរ​មាន​ពិរុទ្ធ ដោយ​ផ្អែក​លើ​សាក្ខី​កម្ម​ជា​លាយ​ល័ក្ខអក្សរ​របស់​អតីត​មន្រ្តី​នគរ​បាល។ ដែល​ការ​នេះ ចៅក្រម​ទាំង​អស់​បាន​សម្រេច​បដិសេធ​ជា​លក្ខណៈ​ប្រព័ន្ធ និង​ព្រងើយ​កន្តើយ​លើ​ភស្តុតាង និង​សាក្ខី​កម្ម​នានា ដែល​គាំទ្រ ប៊ន សំណាង និង សុខ សំអឿន រួម​មាន ៖

- សាក្សី​ផ្ទាល់​ភ្នែក​តែ​ម្នាក់​នៅ​ក្នុង​អំពើ​ឃាតកម្ម​នេះ (អ្នក​លក់​កាសែត ដែល​បាន​ឈរ​ជិត​លោក ជា វិជ្ជា នៅ​ពេល​ដែល​លោក​ត្រូវ​បាន​គេ​សម្លាប់) ដែល​បាន​បង្ហាញ​ថា លោក ប៊ន សំណាង និងសុខ សំអឿន មិនមែន​ជា​ឃាតករ ដូច​ដែល​នាង​បាន​ឃើញ​កាល​ពី​ថ្ងៃនោះ​ទេ។

- អតីត​អ្នក​ដឹកនាំ​ការ​ស៊ើប​អង្កេត​ករណី​ឃាតកម្ម​នេះ ដែល​ជា​អតីត​អគ្គស្នងការ​នគរបាល​រាជធានី​ភ្នំពេញ លោក ហេង ពៅ (បន្ទាប់​ពី​បាន​បាត់បង់​តំណែង​ដ៏មាន​អំណាច) ដែល​បាន​បង្ហាញ​ថា លោក ប៊ន សំណាង និងសុខ សំអឿន មិនមែន​ជា​ឃាតករ​នោះ​ទេ។

- សាក្សី​ផ្ទាល់​ភ្នែក ដែល​បង្ហាញ​ថា លោក ប៊ន សំណាង ស្ថិត​នៅ​ខេត្ត​ព្រៃវែង ដែល​មាន​ចម្ងាយ ៦០​គីឡូម៉ែត្រ​ពី​រាជធានី​ភ្នំពេញ នៅ​ខណៈ​ពេល​ដែល​មាន​អំពើ​ឃាតកម្ម​កើត​ឡើង។

- ការ​ធ្វើ​ទារុណ​កម្ម​ដោយ​មន្ត្រី​នគរបាល​ទៅ​លើ​លោក ប៊ន សំណាង ដើម្បី​គម្រាម​ឲ្យ​ឆ្លើយ​សារភាព​ជា​បឋម ហើយ​ដែល​ក្រោយ​មក​លោក​បាន​ធ្វើ​ការ​កែ​តម្រូវ​ភ្លាមៗ។

- សាក្សី​ម្នាក់​បាន​បង្ហាញ​ថា នៅ​ពេល​មាន​អំពើ​ឃាតកម្ម លោក សុខ សំអឿន កំពុង​តែ​នៅ​ជា​មួយ​លោក និង​មិត្តភក្តិ​មួយ​ចំនួន​ទៀត។

អ្នក​នាង ណាលី ពីឡូក នាយិកា​អង្គការ​សិទ្ធិ​មនុស្ស​លីកាដូ បាន​និយាយ​ថា សាលដីកា​របស់​សាលា​ឧទ្ធរណ៍​កាល​ពី​ថ្ងៃ​ម្សិលមិញ គឺ​ជា​ការ​បន្ថែម​លើ​សោកនាដកម្ម​ជា​ច្រើន ដែល​បាន​កើត​ឡើង​នៅ​ក្នុង​ឆ្នាំ​២០១២ ហើយ​ធ្វើ​ឲ្យ​ឆ្នាំ​នេះ គឺ​ជា​ឆ្នាំ​ដែល​អាក្រក់​បំផុត​ក្នុង​អំឡុង​ពេល​មួយ​ទសវត្សរ៍​នេះ​ទៅ​លើ​ស្ថានភាព​សិទ្ធិ​មនុស្ស និង​នីតិរដ្ឋ។ «យើង​ខ្ញុំ​សូម​ធ្វើ​ការ​ជំរុញ​ឲ្យ​តុលាការ​កំពូល សូម​មេត្តា​ធ្វើ​ការ​ផ្លាស់​ប្តូរ​ទៅ​រក​ភាព​ដើម​វិញ នូវ​សេចក្តី​សម្រេច​នេះ និង​បញ្ចប់​សកម្មភាព​គួរ​ឲ្យ​អស់​សំណើច​នេះ ដោយ​ធ្វើ​ការ​សម្រេច​ឲ្យ​អ្នក​ទាំង​ពីរ (ប៊ន សំណាង និង សុខ សំអឿន) គ្មាន​ពិរុទ្ធ​ទៅ​លើ​បទ​ល្មើស​ព្រហ្មទណ្ឌ ដែល​អ្នក​ទាំង​ពីរ​មិន​បាន​ប្រព្រឹត្ត»៕

Copyright © 2010-2014 · The Free Press Magazine · All Rights Reserved.
-