ស្ថានទូតសហរដ្ឋអាមេរិកប្រចាំប្រទេសកម្ពុជា រួមជាមួយស្ថានទូតអង់គ្លេស នឹងរួមគ្នាធ្វើការបញ្ចាំងការប្រកួតកីឡាប៉ារ៉ាអូឡាំពិក ដែលជាកីឡាអូឡាំពិកសម្រាប់ជនពិការ ដោយផ្សាយផ្ទាល់ពីទីក្រុងឡុងដ៍ ប្រទេសអង់គ្លេសនាថ្ងៃទី០៥ ខែកញ្ញា ឆ្នាំ២០១២ វេលាម៉ោង៤និង៣០នាទី រហូតដល់ម៉ោង៨យប់នៅស្ថានទូតសហរដ្ឋអាមេរិកក្នុងទីក្រុងភ្នំពេញ។
តាមសេចក្តីប្រកាសព័ត៌មាន ការបញ្ចាំងផ្ទាល់ការប្រកួតកីឡាប៉ារ៉ាអូឡាំពិកនេះ គឺមានការជួយពីអង្គការ Veterans International Cambodia, អង្គការក្រុមប្រឹក្សាសកម្មភាពជនពិការ (Disability Action Council), អង្គការជនពិការកម្ពុជា (Cambodia Disabled People’s Organization) និងអង្គការជនពិការអន្តរជាតិ (Handicap International)។ ហើយភ្ញៀវដែលត្រូវបានអញ្ជើញមកទស្សនារួមមានជនរងគ្រោះដោយគ្រាប់មីន និងជនពិការ ដែលវាដើម្បីបង្ហាញពីការភ្ជាប់គម្លាតគ្នា និងការទទួលយកជនពិការ។
ការប្រកួតកីឡាប៉ារ៉ាអូឡាំពិកនេះ ប្រទេសកម្ពុជាក៏បានបញ្ជូនកីឡាការិនីម្នាក់ទៅចូលរួមប្រកួតផងដែរ។ កីឡាការិនីកម្ពុជានឹងចូលរួមប្រកួតជុំទី១ ក្នុងការរត់ល្បឿនចម្ងាយ២០០ម៉ែត្រនាថ្ងៃទី០៥ កញ្ញា នោះ វេលាម៉ោង៥រសៀល ម៉ោងនៅប្រទេសកម្ពុជា៕
