ជនជាតិឥណ្ឌូណេស៊ីចំនួន១១៤នាក់ ដែលអាជ្ញាធរកម្ពុជាបានចាប់ខ្លួនកាលពីពេលថ្មីៗនេះ ពីបទបើកល្បែងស៊ីសងខុសច្បាប់ ត្រូវបាននិរទេសទៅកាន់ប្រទេសឥណ្ឌូណេស៊ីហើយកាលពីថ្ងៃសៅរ៍។
ជនជាតិឥណ្ឌូណេស៊ីដែលអាជ្ញាធរកម្ពុជាចាប់ខ្លួន កាលពីសប្តាហ៍មុន
លោក ឆៃ ស៊ីណារិទ្ធ ប្រធាននាយកដ្ឋានសន្តិសុខផ្ទៃក្នុង នៃក្រសួងមហាផ្ទៃបាននិយាយប្រាប់បណ្តាញព័ត៌មានក្នុងស្រុកថា ជនជាតិឥណ្ឌូណេស៊ីចំនួន១១៤នាក់ ដែលបានឃាត់ខ្លួនកាលពីសប្តាហ៍មុន ពីបទដំណើរការប្រព័ន្ធចាក់បាល់ខុសច្បាប់រយៈពេលជាង១ឆ្នាំនោះ ត្រូវបាននិរទេសហើយ។
ប្រធាននាយកដ្ឋានសន្តិសុខផ្ទៃក្នុង នៃក្រសួងមហាផ្ទៃរូបនេះបានបន្តថា បន្ទាប់ពីមានការចរចាជាមួយឥណ្ឌូណេស៊ី អាជ្ញាធរកម្ពុជាក៏សម្រេចនិរទេសពួកគេ ដោយមិនធ្វើការចោទប្រកាន់នៅកម្ពុជាឡើយ។ ហើយក៏បានបញ្ចប់ការស៊ើបអង្កេតលើប្រតិបត្តិករល្បែងផងដែរ។
គួររំលឹកថា ជនជាតិឥណ្ឌូណេស៊ីចំនួន១១៤នាក់ ត្រូវបានអាជ្ញាធរកម្ពុជាចាប់ខ្លួនកាលពីថ្ងៃទី១០ កញ្ញា ពីទីកន្លែង២ផ្សេងគ្នាក្នុងសង្កាត់បឹងកេងកងទី២ ខណ្ឌចំការមន ក្រុងភ្នំពេញ បន្ទាប់ពីរកឃើញថា ពួកគេបានបើកល្បែងភ្នាល់បាល់តាមអ៊ីនធឺណេត ដែលច្បាប់របស់ប្រទេសកម្ពុជាបានហាមឃាត់៕
