ផ្ដើមពីថ្ងៃទី ១៤កញ្ញា នេះហើយ តាមគម្រោងបណ្ដាញសហគមន៏ព្រៃឡង់ដែលមានគ្នីគ្នា៥រយនាក់រួមជាមួយម៉ូតូចំនួន៣រយគ្រឿងជាមធ្យោបាយ ពួកគេនឹងរុលចូលទៅក្នុងព្រៃឡង់ដើម្បីស្វែងរកនិងទប់ស្កាត់បទល្មើសព្រៃឈើ នៅក្នុងតំបន់ព្រៃដែលត្រូវបានគេចាត់ទុកថា អាម៉ាហ្សូន កម្ពុជានេះ ។
ឈើក្នុងតំបន់ ព្រៃឡង់ ដែល កំពុង រង ការ កាប់បំផ្លាញ ពី ក្រុម ហ៊ុន ឈ្មួញ ដែល ទទួល បាន សិទ្ធិ ពី រដ្ឋ
យោងតាមសេចក្ដីប្រកាសព័ត៌មានរបស់បណ្ដាញនេះឲ្យដឹងថា ក្រុមអ្នកចូលរួមដែលមកពីខេត្តព្រះវិហារ កំពងធំ ស្ទឹងត្រែង និង ក្រចេះ នឹង បើកយុទ្ធនាការជាទ្រង់ទ្រាយធំដែលចាប់ផ្ដើមពីថ្ងៃទី១៤កញ្ញានេះ ដល់ថ្ងៃទី១៧កញ្ញា ឆ្នាំ ២០១២ ដោយឆ្ពោះទៅកាន់គោលដៅសំខាន់ៗដែលកំពុងតែកើតមានការ កាប់ បំផ្លាញ និង ឈូសឆាយដីព្រៃឈើ ក្នុងនោះមានដូចជា ៖ តំបន់ទូកមាស និង តំបន់ប្រាំ នៅជាប់ព្រំប្រទល់ខេត្ត ព្រះវិហារ និង ស្ទឹងត្រែង តំបន់អូរក្រាក់ ក្នុងខេត្ត ក្រចេះ និង តំបន់ក្បាលទឹកថ្លា ក្នុងខេត្ត កំពង់ធំ ជាដើម។
ព្រៃឡង់ដែលត្រូវបានចាត់ទុកថា ជាអាម៉ាហ្ស៊ូនកម្ពុជាមានព្រំប្រទល់ជាប់ខេត្តចំនួន៤មានខេត្ត កំពង់ធំ ព្រះវិហារ ស្ទឹងត្រែង និង ក្រចេះ គឺជាទីពំនាក់អាស្រ័យខាងជីវភាពរបស់ប្រជាពលរដ្ឋដែលភាគច្រើនជាជនជាតិភាគតិចប្រមាណ៦ម៉ឺនគ្រូសារ នៅជាប់តំបន់នេះរាប់ជំនាន់មកហើយ ។ តែបន្ទាប់ពីរដ្ឋាភិបាលបានផ្ដល់ផ្ទៃដីព្រៃឈើក្នុងតំបន់នេះទៅឲ្យក្រុមហ៊ុនឯកជនក្រោមរូបភាពដីសម្បទានសេដ្ឋកិច្ច ព្រៃឈើត្រូវបានគេបំផ្លាញយ៉ាងវិនាស ដែលបង្ខំចិត្តឲ្យប្រជាពលរដ្ឋក្នុងតំបន់នោះ ត្រូវតែក្រោកឡើងតវ៉ា ដើម្បីការពារជីវភាពរបស់ពួកគេ៕
